Farai un vers, pos mi sonelh,
e·m vauc e m'estauc al solelh;
donnas i a de mal conselh,
e sai dir cals:
cellas c'amor de chevaler
tornon a mals.
Donna no fai pechat mortau
que ama cheavaler leau:
mas s'ama monge o clergau,
non a raizo:
per dreg la deuria hom cremar
ab un tezo.
En Alvernhe, part Lemozi,
m'en anei totz sols a tapi;
trobei la moiller d'en Guari
e d'en Bernart;
saluderon mi simplamentz,
per Saint Launart.
La una·m diz en son lati:
«O, Deus vos salf, don peleri;
mout mi senblatz de bel aizi,
mon escient;
mas trop vezem anar pel mon
de folla gent.»
Ar auzires c'ai respondut;
anc no li diz ni bat ni but,
ni fer ni fust no ai mentagut,
mais sol aitan:
«Babariol, babariol,
babarian.»
«Sor», diz n'Agnes a n'Ermessen,
«trobat avem q'anam queren!»:
«Sor, per amor Deu, l'alberguem,
que ben es mutz,
e ja per lui nostre conselh
non er sabutz.»
La una·m pres sotz son mantel
e mes m'en sa cambra, el fornel;
sapchatz qu'a mi fo bon e bel,
e·l focs fo bos,
et eu calfei me volenter
als gros carbos.
A manjar mi deron capos,
e sapchatz aig i mais de dos;
e no·i ac cog ni cogastros,
ma sol nos tres;
e·l pans fo blancs e·l vins fo bos
e·l pebr'espes.
«Sor, si aqest hom es ginhos
e laissa lo parlar per nos,
nos aportem nostre gat ros
de mantenent,
qe·l fara parlar az estros,
si de re·nz ment.»
N'Agnes anet per l'enoios:
e fo granz et ag loncz guinhos;
e eu, can lo vi entre nos,
aig n'espavent,
qu’a pauc no·n perdei la valor
e l'ardiment.
Quan agrem begut e manjat,
e·m despoillei per lor grat;
detras m'aporteron lo chat
mal e felon:
la una·l tira del costat
tro al talon.
Per la coa de mantenen
tira·l gat, el escoisen:
plajas mi feron mais de cen
aquella vetz,
mas eu no·m mogra ges enguers
qui m'ausizetz.
«Sor», diz n'Agnes a n'Ermessen,
«mutz es, que ben es conoissen.»
«Sor, del bainh nos apareillem
e del sojorn.»
Ueit jorn ez ancar mais estei
az aqel torn.
Tant las fotei com auziretz:
cent e quatre-vintz et ueit vetz,
que a pauc no·i rompei mos corretz
e mos arnes;
e no·us puesc dir lo malavegz,
tan gran m'en pres.
Monet, tu m'iras al mati,
mo vers porteras el borssi,
dreg a la molher d'en Guari
e d'en Bernat:
e diguas lor que per m'amor
aucizo·l cat!